Monday, May 29, 2017

17. திரைப்பாடல்களில் கர்நாடக இசை

 'The journey of classical Music in Tamul Films' என்ற தலைப்பில் திரு எம்.ஓ. பார்த்தசாரதி (எம் ஓ பி),  திரு பத்ரி இருவரும் இணைந்து மந்தைவெளி ரயில் நிலையத்துக்கு எதிரில் உள்ள கார்த்திக் ஃபைன் ஆர்ட்ஸ் ராஜகோபால்  அரங்கில்  இன்று (28/05/17) மாலை ஒரு நிகழ்ச்சி நடத்தப்  போவதாக என் கைபேசியில் எனக்கு அழைப்பு வந்திருந்தது.

கடந்த 8 மாதங்களாக பெங்களூருவாசி ஆகிவிட்ட நான் இன்று சென்னையில் இருந்ததால் இந்த நிகழ்ச்சிக்குச் சென்றேன்.

ஒரு ராகத்தை எடுத்துக்கொண்டு அந்த ராகத்தைச்  சுருக்கமாக ஆலாபனை செய்து விட்டு, பிறகு அந்த ராகத்தில் அமைக்கப்பட்ட  ஒரு திரைப்படப் பாடலைப் பாடிக் காட்டுவதே நிகழ்ச்சியின் அமைப்பு முறை (format).

ராகங்களைப்  பற்றிய வர்ணனைகள், ஆரோஹண அவரோஹணங்கள் இல்லாமல் ராக ஆலாபனையை மட்டும் சுருக்கமாக வாய் மொழியாகவும், சில சமயம் கீபோர்டைப் பயன்படுத்தியும் செய்து முடித்தது என்னைப்  பொறுத்தவரை பாராட்டப்பட வேண்டிய விஷயம்.கர்நாடக இசை அறியாதவர்களுக்கு, 'இது 32ஆவது மேளகர்த்தா ராகம், கரஹரப்ரியா ஜன்யம் ' போன்ற செய்திகளோ, ஆரோஹண, அவரோஹணங்களோ ஒரு காது வழியே  புகுந்து மற்றோரு காது வழியே வெளியேறுகிற விஷயங்களாகத்தான் இருக்கும் என்பது என் அனுபவம்!

இவையெல்லாம் வேண்டும் என்பவர்கள் சாருலதா மணியோடு சேர்ந்து இசைப்பயணம் செய்யலாம்! மூன்று வேளை  சாப்பாடு, தங்கும் இடம், குறிப்பிட்ட தலங்களுக்கு வழிகாட்டியுடன் விஜயம் போன்ற அம்சங்கள் நிறைந்த பேக்கேஜ் டூர் போல் அது வேறொரு அனுபவம்!

பாட வகுப்புகள், கனமான விஷயங்கள் போன்ற 'சங்கதிகள்' இல்லாமல்   ஒரு மாலைப் பொழுதை இனிமையாகக் கழிக்க வேண்டும்  என்று நினைப்பவர்களுக்கு எம் ஓ பி - பத்ரி வழங்கிய இசை நிகழ்ச்சி ஒரு இனிய அனுபவமாக இருந்திருக்கும்.

ஒரு ராகத்தை எடுத்துக்கொண்டு எம் ஓ பி ராக ஆலாபனை செய்ய, பத்ரி அந்த ராகத்தில் அமைந்த ஒரு திரைப்படப் பாடலை(முழுமையாக)ப்  பாடினர். சில பாடல்களை கரியோக்கியிலும் , சிலவற்றை நேரடியாகவும் பாடினார் பத்ரி

நிகழ்ச்சியில் வழங்கப்பட்ட ராகங்கள், பாடல்கள் இவை. (பாடலின் பெயரை க்ளிக் செய்தால் யு டியூபில் பாடலைக் கேட்கலாம். பாடலைக் கேட்க விரும்பும் வாசகர்களுக்காக இந்த இணைப்புகளை நான் சேர்த்திருக்கிறேன்.)

1. ராகம்:  யமன், கல்யாணி
பாடல்: சிந்தனை செய் மனமே
படம்: அம்பிகாபதி
இசை: ஜி.ராமநாதன்

யமன் என்பது ஹிந்துஸ்தானி ராகம், கல்யாணி கர்நாடக ராகம் என்று குறிப்பிட்ட எம் ஓ பி, யமனில் வக்ரப்  பிரயோகம் அதிகம் என்று குறிப்பிட்டார். இரண்டு ராகங்களுக்கும் உள்ள வேறுபாட்டை ஆலாபனை செய்து காண்பித்தார்.

2. ராகம்:  சாருகேசி
பாடல்: மன்மத லீலையை வென்றார் உண்டோ?
படம்: ஹரிதாஸ்
இசை: ஜி.ராமநாதன்

3. ராகம்: ஆபேரி (பீம்ப்ளாஸ்)
பாடல்: நீல வான  ஓடையில் 
படம்: வாழ்வே மாயம்
இசை: கங்கை அமரன்

4.ராகம்:  கீரவாணி
பாடல்: பாட்டுப் பாட வா
படம்: தேன் நிலவு
இசை: ஏ. எம். ராஜா
கீரவாணியை வித்தியாசமாகப் பயன்படுத்தி அமைக்கப்பட்ட பாடல் இது என்று பத்ரி குறிப்பிட்டார்.

5. ராகம்:  தேஷ்
பாடல்: துன்பம் நேர்கையில்
படம்: ஓர் இரவு
இசை: ஆர். சுதர்சனம்

6. ராகம்:  பஹாடி
பாடல்: காலங்களில் அவள் வசந்தம்
படம்: பாவ மன்னிப்பு
இசை: விஸ்வநாதன்-ராமமூர்த்தி

7ராகம்:  நாட்டை
பாடல்: மனதில் உறுதி வேண்டும்
படம்:  சிந்துபைரவி
இசை: இளையராஜா

8. ராக மாலிகை
ஒன்றுக்கு மேற்பட்ட ராகங்கள் ஒரே பாடலில் அமைவது ராக மாலிகை (ராக மாளிகையம் கூட!). தமிழ்ப் பாடல்களில் மிகச் சிறந்த ராகமாலிகைகளில் ஒன்று கர்ணன் படத்தில் வரும் டி .எம்.சௌந்தரராஜன், பி.பி.ஸ்ரீனிவாஸ்  சீர்காழி கோவிந்தராஜன், திருச்சி லோகநாதன் ஆகிய நான்கு தலை சிறந்த பாடகர்களைப்  பாட வைத்து விஸ்வநாதன்-ராமமூர்த்தி இசை அமைத்த தொகையறாப்  பாடல்கள் என்று குறிப்பிட்டார் பத்ரி.

மழை கொடுக்கும் கொடையும் (சீர்காழி கோவிந்தராஜன்) - ஹிந்தோளம்
நாணிச் சிவந்தன (திருச்சி லோகநாதன்)  - கானடா
மன்னவர்  பொருட்களை (டி.எம்.சௌந்தரராஜன்) -  மோஹனம்
என்ன கொடுப்பான் (பி.பி.ஸ்ரீனிவாஸ்) - ஹம்ஸானந்தி
ஆயிரம் கரங்கள் நீட்டி (நால்வரும் இணைந்து) - ரேவதி

(5 பாடல்களையும் பாடிக் காட்டினார் பத்ரி.)

9. ராகம்:  ஆபோகி
பாடல்: தங்க ரதம்  வந்தது
படம்:  கலைக்கோவில்
இசை: விஸ்வநாதன்-ராமமூர்த்தி

10. ராகம்: பிருந்தாவன சாரங்கா  (மேக் மல்ஹர்)
பாடல்: பொன் ஒன்று கண்டேன் 
படம்: படித்தால் மட்டும் போதுமா
இசை: விஸ்வநாதன்-ராமமூர்த்தி

11.ராகம்:  சுத்த சாரங்கி
பாடல்:  இரவும் நிலவும்
படம்: கர்ணன்
இசை: விஸ்வநாதன்-ராமமூர்த்தி

12. ராகம்:  பாகேஸ்ரீ  
பாடல்: நிலவே என்னிடம் நெருங்காதே
படம்:  ராமு
இசை: எம். எஸ். விஸ்வநாதன்
கஜல் பாணியில் அமைந்த முதல் தமிழ்ப் பாடல் இது என்று குறிப்பிட்டார் பத்ரி.

13. ராகம்: கமாஸ் 
பாடல்: சித்திரம் பேசுதடி
படம்: சபாஷ் மீனா 
இசை:  டி .ஜி.லிங்கப்பா

14ராகம்:  சந்த்ர கௌன்ஸ்
பாடல்:  மாலைப் பொழுதின் மயக்கத்திலே  
படம்: பாக்யலக்ஷ்மி
இசை: விஸ்வநாதன்-ராமமூர்த்தி

15. ராகம்:  ஹமீர் கல்யாணி  
பாடல்:  என்னுயிர்த் தோழி கேளொரு சேதி
படம்:  கர்ணன்
இசை: விஸ்வநாதன்-ராமமூர்த்தி

16. ராகம்: மாயாமாளவகௌள 
பாடல்: கல்லெல்லாம் 
படம்: ஆலயமணி 
இசை: விஸ்வநாதன்-ராமமூர்த்தி

17.ராகம்:  தர்பாரி கானடா
பாடல்:  மலரே மௌனமா  தர்பாரி கானடா ராகத்தில் அமைந்த
படம்: கர்ணா
இசை: வித்யாசாகர்
தர்பாரி கனடாவும், ஜோன்புரியும் ஒரே ஸ்கேலில் அமைந்த ராகங்கள் என்று குறிப்பிட்ட எம் ஓ பி இரண்டு ராகங்களுக்கு ம் உள்ள வேறுபாட்டை ஆலாபனை செய்து விளக்கினார். மலரே மௌனமா பாடலின் சில பகுதிகளைப்  பாடிக் காட்டினார்.

நேரம் குறைவாக இருந்ததால், மௌனம் சம்மதம் படத்தில் இடம் பெற்ற தர்பாரி கானடா ராகத்தில் அமைந்த 'கல்யாணத் தேன் நிலா' பாடலின் பல்லவியை மட்டும் பாடினர் பத்ரி.

18. ராகம்:  ஜோன்புரி  
பாடல்: நான் பெற்ற செல்வம்
படம்:  நான் பெற்ற செல்வம்
இசை: ஜி.ராமநாதன்

19. ராகம்: ஹம்சத்வனி  
இந்த ராகம் நிகழ்ச்சி நிரலில் இல்லை. பார்வையாளர் ஒருவரின் விருப்பத்துக்காக இந்த ராகத்தை ஆலாபனை செய்து காட்டினார் எம் ஓ பி.

20. ராகம்: ரீதிகௌளை  
இந்த ராகமும் நிகழ்ச்சி நிரலில் இல்லை. பார்வையாளர் ஒருவரின் விருப்பத்துக்காக இந்த ராகத்தில் அமைந்த 'தலையைக் குனியும் தாமைரையே' பாடலின் சில வரிகளை பாடிக் காட்டினார் பத்ரி 
படம்: ஒரு ஓடை  நதியாகிறது 
இசை: இளையராஜா 

21. ராகம்:  சுத்த தன்யாசி
பாடல்:  நீயே உனக்கு என்றும்  
படம்:  பலே  பாண்டியா
இசை: விஸ்வநாதன்-ராமமூர்த்தி
இந்த ராகமும் நிகழ்ச்சி நிரலில் இல்லை. பார்வையாளர் ஒருவரின் விருப்பத்துக்காக பாடலின் சில வரிகளை பாடிக் காட்டினார் பத்ரி.

22. ராகம்:  சிந்து பைரவி  
பாடல்:  என்னை யாரென்று  
படம்:  பாலும் பழமும்
இசை: விஸ்வநாதன்-ராமமூர்த்தி

கர்நாடக இசைக் கச்சேரிகளை சிந்து பைரவியைப் பாடி நிறைவு செய்யும் வழக்கம் உண்டு. அது போல் இந்த நிகழ்ச்சியையும் சிந்து பைரவி ராகத்தில் நிறைவு செய்தனர் இந்த இருவர்.

என்னை யாரென்று பாடலைப் பாடி முடித்ததும், இதே ராகத்தில் அமைந்த உனக்கென்ன மேலே நின்றாய் (படம்: சிம்லா ஸ்பெஷல் இசை: எம் எஸ் விஸ்வநாதன்) பாடலின் சில வரிகளைப்  பாடி நிறைவு செய்தார் பத்ரி.

'உனக்கென்ன மேலே நின்றாய்' என்ற வரிகளைக் கேட்டதும் மேலே வீற்றிருக்கும், என்றும் நம் நெஞ்சில் மேலே நிற்கும் பாடல்களை வழங்கிய எம் எஸ் வியை நினைத்து மன நிறைவுடன் எம் ஓ பி, பத்ரி இருவருக்கும் என் நன்றியையும், பாராட்டுகளையும் தெரிவித்து விட்டுக்  கிளம்பினேன். 

Saturday, December 17, 2016

16. ஒரு வெட்டி ஆராய்ச்சி


பல பழைய தமிழ்ப் பாடல்களில் கிராமஃபோன் ரிகார்டில் வரும் (ரேடியோவில் ஒலிபரப்பப்படும்) வார்த்தைகள் சில திரைப்படத்தில் மாற்றப்பட்டிருக்கும். இதற்குக் காரணம் சென்ஸார் சில வார்த்தைகளை ஏற்றுக்குள்ளாதது. பொதுவாக, அரசியல் சார்பு, மதஉணர்வைப் புண்படுத்துவதாக அமைவது, காமம், ஆபாசம் போன்ற காரணங்களுக்காக சென்ஸார் ஆட்சேபங்களை எழுப்புவது வழக்கம். தயாரிப்பாளர்களும், இயக்குனர்களும் சென்ஸார் சான்றிதழ் வாங்கிப் படத்தை வெளியிட வேண்டும் என்ற அவசரத்தில் ஏதோ ஒரு வகையில் வார்த்தையை மாற்றிப் பாடகர்களை அந்த வார்த்தைகளை மட்டும் பாட வைத்து மாற்றி விடுவார்கள் என்று அறிகிறேன். சில மாற்றங்கள் வேடிக்கையாகவும், அபத்தமாகவும் இருக்கும். என் நினைவுக்கு வரும் சிலவற்றை இங்கே தருகிறேன். கடைசியாக நான் கொடுத்திருக்கும் உதாரணத்தில், சந்திரோதயம் பாடலின் ஒரு சரணம் முழுவதையும் வாலி அற்புதமாக மாற்றி அமைத்திருப்பதை வியந்திருக்கிறேன்.

1. படம்: அடுத்த வீட்டுப் பெண் பாடல்: காக்கை காக்கைக் கழகம் இது

இசைத்தட்டு
காக்கை காக்கைக் கழகம் இது
காரியம் கைகூடும் கழகம் இது  (கா.கை. கழகம் - காரியம்  கைகூடும்  கழகம்)

படம்
கற்றோர் நிறைந்த சங்கம் இது
காரியம் கைகூடும் சங்கம் இது

(கழகம் என்ற பெயர் கூடாது என்று சென்சஸார் வலியுறுத்தியிருக்கக் கூடம்!)

2. படம்: பாவ மன்னிப்பு  பாடல்: பாலிருக்கும்

இசைத்தட்டு
வேதமெல்லாம் காதலையே மறுக்கவில்லையே- அது
வேதம் செய்த குருவைக் கூட விடுவதில்லையே!

படம்
வேதமெல்லாம் காதலையே மறுக்கவில்லையே- அது
மேகம் செய்த உருவம் போல மறைவதில்லையே!

3. படம்: சுமைதாங்கி  பாடல்: எந்தன் பருவத்தின் கேள்விக்கு
இசைத்தட்டு
எந்தன் பருவத்தின் கேள்விக்கு பதில் என்ன சொல்லடி ராதா?

படம்
எந்தன் பார்வையின் கேள்விக்கு பதில் என்ன சொல்லடி ராதா?

4. படம்: பணக்காரக் குடும்பம்  பாடல்: பறக்கும் பந்து பறக்கும்
இசைத்தட்டு
அடங்கும் ஆசை அடங்கும்

படம்
அடங்கும் அன்பு அடங்கும்

5.படம்: வல்லவன் ஒருவன்  பாடல்: அம்மம்மம்மா கன்னத்தில் கன்னம்
இசைத்தட்டு
முத்தம் என்பது புதுமையா?
முகத்துக்கு மேலே வா வா!

படம்
முத்தம் என்பது புதுமையா?
அழகுக்கு மேலே வா வா!

6. படம்: பெற்றால்தான் பிள்ளையா?  பாடல்: நல்ல நல்ல பிள்ளைகளை நம்பி
இசைத்தட்டு
மேடையில் முழங்கு அறிஞர் அண்ணா போல்

படம்
மேடையில் முழங்கு திருவிக போல்

7. படம்: அன்பே வா  பாடல்: புதுய வானம் புதிய பூமி
இசைத்தட்டு
உதய சூரியனின் பார்வையிலே
உலகம் விழித்துக் கொண்ட வேளையிலே

படம்
புதிய சூரியனின் பார்வையிலே
உலகம் விழித்துக் கொண்ட வேளையிலே

8 .படம்: பூவும் பொட்டும்  பாடல்: எண்ணம் போல
இசைத்தட்டு
கண்ணன் வழங்கும் இன்ப உலகம்

படம்
கண்ணன் வழங்கும் இந்த உறவு

9.படம்: எங்க வீட்டுப் பிள்ளை  பாடல்: நான் ஆணையிட்டால்

இசைத்தட்டு
எதிர்காலம் வரும் என் கடமை வரும்
இந்தக் காக்கைகள் கூட்டத்தை ஒழிப்பேன்.

படம்
எதிர்காலம் வரும் என் கடமை வரும்
இந்தக் கூட்டத்தின் ஆட்டத்தை ஒழிப்பேன்.

10. படம்: சந்திரோதடயம்  பாடல்: சந்திரோதயம் ஒரு பெண்ணானதோ?
இசைத்தட்டு
இதழோடு இதழ் வைத்து இமை மூடவோ
இருக்கின்ற சுகம் வாங்கத் தடை போடவோ
மடி மீது தலை வைத்து இளைப்பாறவோ
முகத்தோடு முகம் வைத்து முத்தாடவோ

படம்
எழிலோடு எழில் வைத்து இமை மூடவோ
எனக்கென்று சுகம் வாங்கத் துணை தேடவோ
மலர் மேனி தனைக் கண்டு மகிழ்ந்தாடவோ
மணக்கின்ற தமிழ் மண்ணில் விளையாடவோ

Tuesday, July 12, 2016

15. கடவுள் நம்பிக்கை - பல நிலைகள்


பக்தி 
சிந்தனை செய் மனமே 
செய்தால் தீவினை அகன்றிடுமே 
சிவகாமி மகனை ஷண்முகனை 
சிந்தனை செய் மனமே! 
மனமே, தினமே! 

அடைக்கலம் 
அம்மாவும் நீயே அப்பாவும் நீயே 
அன்புடனே ஆதரிக்கும் தெய்வமும் நீயே! 

பரவசம் 
நாராயண மந்த்ரம் - அதுவே 
நாளும் பேரின்பம். 

கோரிக்கை 
கேட்டதும் கொடுப்பவனே க்ருஷ்ணா க்ருஷ்ணா 
கீதையின் நாயகனே க்ருஷ்ணா, க்ருஷ்ணா! 

கெஞ்சல் 
ஆண்டவனே உன் பாதங்களை என் கண்ணீரில் நீராட்டினேன் 
இந்த ஓருயிரை நீ வாழ வைக்க இன்று உன்னிடம் கையேந்தினேன். 

இயலாமை 
ஆட்டுவித்தால் ஆரொருவர் 
ஆடாதாரோ கண்ணா? 
ஆசையென்னும் தொட்டிலினிலே 
ஆடாதாரோ கண்ணா? 

வெறுப்பு 
கையளவு உள்ளம் வைத்து 
கடல் போல் ஆசை வைத்து 
விளையாடச் சொன்னானடி - அவனே 
விளையாடி விட்டானடி. 

நன்றி 
கண்ணன் வந்தான் அங்கே கண்ணன் வந்தான் - ஏழை 
கண்ணீரைக் கண்டதும் கண்ணன் வந்தான். 

புலம்பல் 
ஆண்டவன் முகத்தைப் பாக்கணும் 
அவங்கிட்டே ஒண்ணே ஒண்ணு கேக்கணும் 
ஏண்டா சாமி என்னப் படைச்சே? 
என்னைப் படைக்கையிலே என்ன நெனச்சே? 

வேதனை  
அழுதால் என்ன தொழுதால் என்ன 
நடக்கும் கதைதான் நடக்குதப்பா!

கோபம் 
கடவுள் மனிதனாகப் பிறக்க வேண்டும் 
... படுவான், துடித்திடுவான் 
பட்டதே போதுமென்பான். 

விரக்தி 
இறைவன் இருக்கின்றானா? 
மனிதன் கேட்கிறான் 
அவன் இருந்தால் உலகத்திலே 
எங்கே வாழ்கிறான்? 
நான் ஆத்திகனானேன் 
அவன் அகப்படவில்லை. 
நான் நாத்திகனானேன் 
அவன் பயப்படவில்லை. 

முதிர்ச்சி 
பூஜ்ஜியத்துக்குள்ளே ஒரு 
ராஜ்ஜியத்தை ஆண்டு கொண்டு 
புரியாமலே இருப்பான் ஒருவன் - அவனைப் 
புரிந்து கொண்டால் அவன்தான் இறைவன்! 

நன்றி - திரைப்படப் பாடல்கள் 


Saturday, January 23, 2016

14. இலக்கு நோக்கிய பயணம்

டேவிட் ஷ்வார்ட்ஸ் எழுதிய 'உயர்ந்த சிந்தனையின் மந்திர சக்தி' (Magic of Thinking Big) என்ற புத்தகம் பல  இளைஞர்களுக்கு ஊக்கம் அளித்திருக்கிறது. வாழ்க்கையில் வெற்றி பெற உதவும் சில கோட்பாடுகளை அவர் விளக்குகிறார்.

இன்றைய  இளைஞர்கள் எந்த ஒரு குறிக்கோளும், நோக்கமும் இல்லாமல் தங்கள் கல்வியையும், தொழிலையும் தேர்ந்தெடுப்பது துரதிர்ஷ்டவசமானது. தங்கள் முயற்சியில் அவர்களால் அதிக வெற்றி அடைய முடிவதில்லை. அதனால் அவர்கள் விரக்தியடைந்து மற்றவர்களைக் குறை சொல்லத் துவங்குகிறார்கள். இது ஒரு ஆரோக்கியமற்ற பழக்கம்.

ஷ்வார்ட்ஸின் நூலின் மூன்றாவது பகுதியில் அவர் வாழ்க்கையில் வெற்றி பெற இலக்குகள் எந்த அளவுக்கு முக்கியம் என்பது பற்றி விளக்குகிறார். சரியான குறிக்கோள் இல்லாமல் ஒரு வேலையைத் தேர்ந்தெடுப்பது வீணான முயற்சி.

முதலில், நமது தொழில் குறித்த இலக்குகளை நாம் தெளிவாக வகுத்துக் கொள்ள வேண்டும். வேலை, குடும்பம், சமூக வாழ்க்கை ஆகிய மூன்று துறைகளிலும் நமது எதிர்காலம் எப்படி இருக்க வேண்டும் என்பது பற்றிய மனத்தோற்றத்தை உருவாக்க வேண்டும்.

இரண்டாவதாக, கீழ்க்கண்ட மூன்று கேள்விகளைக் கேட்டுக்கொண்டு, அவற்றுக்குத் தெளிவான விடை காண வேண்டும்:
1) என் வாழ்க்கையில் நான் என்ன சாதிக்க விரும்புகிறேன்?
2) நான் என்னவாக ஆக வேண்டும் என்று விரும்புகிறேன்?
3) எது எனக்கு மகிழ்ச்சியையும் திருப்தியையும் அளிக்கிறது?

நமது கண்டுபிடிப்புகள், மருத்துவ முன்னேற்றங்கள் பொறியியல் சாதனைகள், தொழில்துறை வெற்றிகள் இவை எல்லாமே சிலரது மனதில் கற்பனை செய்யப்பட பிறகுதான் செயல் வடிவம் பெற்றன. இன்று பல குட்டி நிலாக்கள் (செயற்கைக் கோள்கள்) பூமியைச் சுற்றி வருவது தற்செயலாக நடந்த செயல் அல்ல - விஞ்ஞானகள் விண்வெளியை வெற்றி கொள்ள வேண்டும் என்ற இலக்கை மேற்கொண்டதால் ஏற்பட்டவை.

இலக்கு, குறிக்கோள் அல்லது நோக்கம் என்பது வெறும் கனவு அல்ல. கனவை உண்மையாக்கும் செயல். "என்னால் இப்படிச் செய்ய முடிந்தால் நன்றாக இருக்குமே"  என்று நினைப்பது இலக்கு அல்ல. "நான் இதை அடைவதற்காகத்தான் உழைத்துக் கொண்டிருக்கிறேன்" என்ற தெளிவான எண்ணம்தான் இலக்கு.

ஒரு இலக்கு தீர்மானிக்கப்படும் வரை எதுவுமே நடக்காது. எந்த முன்னேற்றமும் ஏற்படாது. இலக்கு இல்லாத மனிதர்கள் வாழ்க்கையில் எங்கோ அலைந்து திரிகிறார்கள். எங்கே போகிறோம் என்று தெரியாமல் தடுமாறி, இறுதியில் அவர்கள் எங்கேயும் போய்ச் சேர்வதில்லை!

உயிர் வாழக் காற்று எப்படி அவசியமோ அதுபோல வாழ்க்கைக்கு இலக்கு அவசியம்.

ஒரு விளம்பர நிறுவனத்தின் தபால் அனுப்பும் பிரிவில் வாரத்துக்கு 25 டாலர் சம்பளம்  வாங்கிகொண்டிருந்த தவே மகோனி என்பவர் தனது 27ஆவது வயதில் ஒரு விளம்பர நிறுவனத்தின் துணைத்தலைவர் ஆனார். 33ஆவது வயதில் இன்னொரு நிறுவனத்தின் தலைவர் ஆனார்.

இலக்குகளைப்பற்றி  அவர் சொல்வதைக் கேளுங்கள். "நீங்கள் முன்பு எங்கே இருந்தீர்கள், இப்போது எங்கே எங்கே இருக்கிறீர்கள், என்பவை முக்கியமல்ல. நீங்கள் எங்கே போக விரும்புகிறீர்கள் என்பதுதான் முக்கியம்."

ஒரு வளரும் நிறுவனம் அடுத்த 10 அல்லது 15 ஆண்டுகளில் என்ன செய்ய வேண்டும் என்று திட்டமிடுகிறது. முன்னணி நிறுவனங்களில் உயர் அதிகாரிகளாகப் பணியாற்றுபவர்கள் "இன்னும் 10 வருடங்களில் நமது நிறுவனம் எங்கே இருக்க வேண்டும்?" என்று சிந்திக்க வேண்டும். அதற்கேற்ப முயற்சிகளை மேற்கொள்ள வேண்டும்

ஒரு புதிய நிறுவனத்தின் உற்பத்தித் திறன் இன்றைய தேவையின் அடிப்படையில்  தீர்மானிக்கப்படுவதில்லை. இன்னும் 5 அல்லது 10 ஆண்டுகளுக்கான தேவையை வைத்துத் தீர்மானிக்கப்படுகிறது. இன்னும் 10 ஆண்டுகளுக்குப் பிறகு தேவைப்படக்கூடிய பொருட்களை பற்றி ஆராய்ச்சி மேற்கொள்ளப்படுகிறது.

இன்றைய வியாபார நிறுவனம் தனது எதிர்காலத்தை நடக்கிறபடி நடக்கட்டும் என்று விட்டு விடுவதில்லை. நீங்கள் விட்டு விடப் போகிறீர்களா?

முன்னேறிச் செல்லும் தொழில் நிறுவனங்களிடமிருந்து நாம் ஒவ்வொருவரும் பாடம் கற்கலாம். நாம் அடுத்த பத்தாண்டுகளுக்கு நமது வாழ்க்கையைத் திட்டமிட வேண்டும். நம்மால் அது முடியும்.

Monday, July 13, 2015

13. இரண்டெழுத்து இசை தத்தெடுத்த மூன்றெழுத்து!

உன் இசை கேட்டால் புவி அசைந்தாடும்
இது இறைவன் அருளாகும்!

இன்று காலை எழுந்ததும் நண்பர் முரளி SMS மூலம் அனுப்பியிருந்த துயரச் செய்தியைப் பார்த்தேன். இறப்பை philosophical ஆக எடுத்துக் கொள்வது என் இயல்பு. பதினோரு ஆண்டுகள் முன்பு என் தாயார்  இறந்தபோதும் இது போன்ற மனநிலைதான் எனக்கு இருந்தது. 43 வருடம் முன்பு என் 21ஆவது வயதில் என் தந்தையை இழந்தபோது இருந்த உணர்வுகள் வேறு. அந்த அதிர்ச்சி, நம்ப இயலாத் தன்மை எல்லாம் அந்த மரணத்தோடு போய் விட்டன.

87 வயதில் உலக வாழ்க்கையைத  துறப்பது எதிர்பாராத விஷயம் அல்ல. ஆயினும் மருத்துவமனையில் சேர்க்கப்பட்டு உடல் தேறி உற்சாகமாகப் பாடி மருத்துவர்களையும் சிகிச்சை பெற்றுக் கொண்டிருந்த மற்றவர்களையும் மகிழ்வித்துக் கொண்டிருந்தவர் மறைந்து விட்டார் என்ற செய்தி அதிர்ச்சியைத்தான் அளித்தது.

ராஜாஜி இறந்தபோது ஜெயகாந்தன் "சக்கரவர்த்தி ராஜகோபாலாச்சாரி சம்பூர்ணமாகி விட்டார்" என்று எழுதினார். சம்பூர்ணம் ஆகி விட்டார்' என்றுதான் எம் எஸ் வியைப் பற்றியும் சொல்ல வேண்டும். எளிய குடும்பத்தில் பிறந்து வாழ்க்கையுடன் போராடி, இசைதான் தமக்கு இறைவன் கொடுத்திருக்கும் வரம் என்பதை அறிந்து கொண்டு அந்த இசையை முறையாகப் பயிலும் வாய்ப்பு இல்லாமலேயே தன் சொந்தத் தேடலாலும் முயற்சிகளாலும் மட்டுமே  இசையில் இதுவரை யாரும் எட்டாத பரிமாணங்களை அநாயாசமாகக் கடந்து நம்மையும் பல புதிய உலகங்களுக்கு அழைத்துச் சென்ற இந்த மேதை இன்று இந்த உலகையும் கடந்து சென்றுவிட்டார்.

ராஜாஜியின் மரணம் பற்றி  எழுதிய சுதந்திரப் போராட்ட வீரரும் ராஜாஜியுடன்
நெருக்கமாகப் பழகியவருமான திரு. K. சந்தானம் "Rajai joins the immortals. Conventional words of mourning about his departure will be inappropriate" என்று ஸ்வராஜ்யா பத்திரிகையில் எழுதினார். இதுவும் எம் எஸ் விக்குப் பொருந்தக் கூடிய புகழுரைதான்.

கந்தர்வ இரட்டையர்களில் ஒருவரான எம் எஸ் வி மற்றவரான கண்ணதாசனுடன் இணைந்து விட்டார். இனி இவர்கள் இருவரும் தேவ லோகத்தையும் கந்தர்வ லோகத்தையும் தங்கள் பாடல்களால் உலுக்கிக் கொண்டிருப்பார்கள்.
                                                     Photo Courtesy msvtimes.com

எம் எஸ் வி அமரரான செய்தி கிடைத்ததும் Youtube இல் நான் தொகுத்து வைத்திருக்கும் அவரது  பல பாடல் தொகுப்புகளில் ஒன்றைக் கேட்டேன். 'நெஞ்சம் மறப்பதில்லை,' 'பாவாடை தாவணியில்,' 'சிங்காரப் புன்னகை' போன்ற பாடல்களைக் கேட்டபோது கண்ணீர் முட்டிக்கொண்டு வந்தது. அவர் இருந்தபோதும் அவரது பல பாடல்கள் கண்ணீரை வரவழைத்திருக்கின்றனவே! எனவே வித்தியாசம் எதுவும் இல்லை!

இருந்த போதும் அழ வைத்தீர்கள்
இறந்த பிறகும் அழ வைத்தீர்கள்!

எம் ஜி ஆர் மறைந்தபோது தினமலர் போஸ்டரில்
'இருந்தாலும் மறைந்தாலும் பேர் சொல்ல வேண்டும்
இவர் போல யார் என்று ஊர் சொல்ல வேண்டும்'
என்ற இரண்டு வரிகளை மட்டும் பிரசுரித்திருந்தார்கள்.

மற்ற எவருக்கும் பொருந்துவதை விட இந்தப் பாடல் வரிகள் இந்தப் பாடலுக்கு  இசை அமைத்த இவருக்குத்தான் அதிகமாகப் பொருந்தும்.

4-12-2010 இல் சென்னை இன் ஃபோஸிஸ் அரங்கில் நடந்த msvtimes.com நான்காவது ஆண்டு விழாவில்,  எம் எஸ் வி இசை அமைத்த படங்கள், பாடல்களின் பெயரை வைத்து அவர் முன்னிலையில் அவருக்கு ஒரு கவிதாஞ்சலி  செய்தேன். அந்தப் பாமாலையயே   இந்த இசை மாமேதைக்கு மலர் வளையமாகச் சமர்ப்பிக்கிறேன்.


Tuesday, June 23, 2015

12. இசைத்தமிழ் நீ(ங்கள்) செய்த அரும் சாதனை


Photo courtsy: msvtimes.com

உலகில் சில அற்புதங்கள் நடப்பதுண்டு. இந்து மதத்துக்குப் புத்துயிர் ஊட்டிய சங்கரரும் ராமானுஜரும் பிறந்தது வெவ்வேறு காலங்களில் (சங்கரர் காலத்தால் முந்தியவர்) என்றாலும் இருவரும் பிறந்தது சித்திரை மாதம் திருவாதிரை நட்சத்திரத்தில்.

நேர்மை மற்றும் எளிமையின் உருவாகத் திகழ்ந்த மகாத்மா காந்தியும் லால் பஹதுர் சாஸ்திரியும் பிறந்தது அக்டோபர் 2 ஆம் தேதி (சாஸ்திரி பிறந்தது காந்தி பிறந்து 35 வருடங்கள் கழித்து.)

அது போன்ற இன்னொரு ஜோடி கவியரசர் கண்ணதாசனும் மெல்லிசை மன்னர் எம்,எஸ்.விஸ்வநாதனும். (பொதுவாக யாரையும் பட்டப் பெயர் சொல்லி நான் குறிப்பிடுவதில்லை. ஆனால் இந்த இருவரையும் பட்டப்பெயர் சொல்லாமல் என்னால் குறிப்பிட முடிவதில்லை!)

கவியரசர் பிறந்தது 1927ஆம் ஆண்டு ஜூன் 24ஆம் தேதி. அடுத்த ஆண்டு அதே மாதம்  19ஆம் தேதி பிறந்தார் இசை அரசர்.

தமிழகத்தில் பிறந்த கண்ணதாசனும், கேரளாவில் பிறந்த விஸ்வநாதனும் சந்தித்து ஒன்று சேர்ந்து தமிழ்த் திரை உலகில் ஒரு சகாப்தம் படைக்க வேண்டும் என்பது ஆண்டவன் கட்டளை போலும்!

இந்த இருவரைப் பற்றி  msvtimes.com/forum வலைப்பதிவில் "இவர்கள் இருவரும் கந்தர்வர்கள். ஏதோ ஒரு முனிவரின் சாபத்தினால் இந்த உலகில்  வந்து பிறந்திருக்கிறார்கள்" என்று ஒரு நண்பர் குறிப்பிட்டிருந்ததை நான் மிகவும் ரசித்தேன்.

'சாபத்தினால்' என்ற வார்த்தையைக் கேட்டு யாரும் மனம் சங்கடப்பட வேண்டியதில்லை. நம் புராணங்களில் முனிவர்களின் சாபத்தினால் தெய்வங்கள் கூட  பூமியில் வந்து பிறந்த பல கதைகள் இருக்கின்றன! மகாபாரதத்தில் வரும் பீஷ்மர், யுதிஷ்டிரர் போன்ற உயர்ந்த பாத்திரங்கள் இவ்வுலகில் வந்து பிறந்தது சாபத்தினால்தான்.

கந்தர்வர்கள் இசையில் உயர்ந்தவர்கள். மிகவும் அற்புதமான பாட்டை கந்தர்வ கானம் என்று சொல்வார்கள். இவர்கள் இருவரும் தங்கள் பாடல்களால் கந்தர்வர்களாக விளங்குகிறார்கள் என்பதுதான் நண்பரின் கருத்து.

கண்ணதாசனும் விஸ்வநாதனும் (விஸ்வநாதன் என்று சொல்லும்போது, விஸ்வநாதன்- ராமமூர்த்தியையும் குறிப்பிட்டுத்தான் சொல்கிறேன்) இணைந்து கொடுத்த பாடல்களில் ஒன்று கூடச் சோடை போனது கிடையாது.

எனக்கு விவரம் அறிந்த காலத்திலிருந்து இவர்கள் பாடல்களையே உணவுடன் சேர்த்து அருந்தி வந்திருக்கிறேன். என்னை வளர்த்ததில் என் தாய் தந்தைக்கு அடுத்தபடியாக இந்த இருவர் இணைந்து கொடுத்த பாடல்களுக்கும் பங்கு உண்டு.

விவரம் புரியாத வயதில் இவர்கள் பாடல்கள் என் மனதில் எத்தனையோ உணர்ச்சிகளை ஏற்படுத்தி இருக்கின்றன. சில சமயம் உடலுக்குள் இனம் புரியாத ஒரு புளகாங்கிதம் ஏற்படும். சில சமயம் ஏதோ ஒரு ஏக்கம் ஏற்படும். சில சமயம் துள்ளிக் குதிக்கலாம் போல் இருக்கும். சில சமயம் கண்களில் கண்ணீர் முட்டும். காரணம் தெரியாது. பல பாடல்களை இப்போது கேட்கும்போதும் அதே உணர்ச்சிகள் எழுகின்றன.

நான் இவர்கள் பாடல்களை ரசிக்கத் துவங்கிப் பல வருடங்களுக்குப் பிறகுதான் பாடல்களை இயற்றியவர் யார், இசை அமைத்தவர் யார் போன்ற விவரங்கள் தெரிய வந்தது. உதாரணமாக 'மணப்பந்தல்' படத்தில் வரும் 'உனக்கு மட்டும் உனக்கு மட்டும்' என்ற பாடல்.

1961இல் வெளியான இப்பாடலை முதலில் கேட்டபோது எனக்கு வயது 10 இருக்கும். அந்த வயதில் இந்தப் பாடல் என்னிடம் ஏன் ஒரு தாக்கத்தை ஏற்படுத்தியது என்பது இன்றுவரை எனக்குப் புரியவில்லை!

இந்த இருவரைப் போல் இணைந்து இவ்வளவு அற்புதமான பாடல்களைக் கொடுத்த ஜோடி இவ்வுலகில் வேறொன்று இருந்ததில்லை என்று நினைக்கிறேன். இது போன்ற ஒரு இணை வேறு துறையில் இருந்திருக்குமா என்பதும் சந்தேகம்தான். தமிழ் தெரியாத மற்றும் என் போன்று இசையின் அடிப்படையை அறியாத பல சாதாரண மக்களை இவர்கள் பாடல்கள் உலுக்கி இருக்கின்றன.

கவிஞரின் பாடல் வரிகளைப் புரிந்து கொண்டு அவற்றுக்கு எம்.எஸ்.வி. உயிர் கொடுத்தது போல் வேறு எந்த மொழியிலும் எந்த இசை அமைப்பாளரும் செய்திருப்பார்களா என்பது சந்தேகம்தான்.

ஒரு கவிஞர்-இசை அமைப்பாளர் என்ற உறவையும் தாண்டி இவர்கள் இருவருக்கும் இருந்த நெருக்கத்தைப் பார்க்கும்போது msvtimes.com நண்பர் சொன்னது போல் இவர்கள் இவ்வுலகில் பிறப்பதற்கு முன்பே ஏதோ ஒரு வகையில் இணைந்திருந்தார்களோ என்று எண்ணத் தோன்றுகிறது.

கண்ணதாசன் பல இசை அமைப்பாளர்களுக்குப் பாடல் எழுதி இருந்தாலும் எம்.எஸ்.வியின் இசையில் அமைந்த பாடல்களுக்கு அவை இணையாகா - கே.வி.மகாதேவன் அவர்கள் இசை அமைத்த கங்கைக்கரைத் தோட்டம், மன்னவன் வந்தானடி போன்ற ஒரு சில பாடல்களைத் தவிர. அதுபோல் எம்.எஸ்.வியிடம் இருந்த நெருக்கம் போல் கண்ணதாசனுக்கு மற்ற இசை அமைப்பாளர்களிடம் இருந்ததில்லை.

எம்.எஸ்.வியைப் பொறுத்தவரை யார் எழுதிய பாடலாக இருந்தாலும் அவரது இசை அமைப்பு golden touch அமைந்ததாகத்தான்ஆகத்தான் இருக்கும். 'அந்த நாள் ஞாபகம்' பாட்டைப் பற்றிக் குறிப்பிடும்போது 'மூச்சுக் காற்றுக்குக் கூட இசை அமைத்திருக்கிறார் எம்.எஸ்.வி.' என்று ஏ.வி.எம் சரவணன் அவர்கள் ஒருமுறை குறிப்பிட்டது நினைவுக்கு வருகிறது! ஆயினும் கண்ணதாசன் பாடல்களுக்கு இசை அமைப்பதற்கென்று என்றே தனது ஆர்மோனியத்தில் ஒரு தனிப் பகுதியை ஒதுக்கி வைத்திருப்பார் போலும் எம்.எஸ்.வி.!

கவிஞர் வாலி எழுதிய எனக்கொரு காதலி இருக்கின்றாள் என்ற பாடலைக் கேட்கும்போது இந்தப் பாடல் கண்ணதாசனையும் எம்.எஸ்.வியையும் குறித்து எழுதப்பட்டிருப்பதாக எனக்குத் தோன்றியது. ஆர்வமுள்ளவர்கள் இது பற்றிய எனது பதிவை இங்கே பார்க்கலாம்.

திரை இசையின்   எல்லாப் பரிமாணங்களையும் அனாயாசமாகக் கையாண்டவர் எம்.எஸ்.வி. அவருக்குப் பின்னால் வந்த இசை அமைப்பாளர்கள் செய்ததாகச் சொல்லிக்கொள்ளும் சாதனைகளை அவர் பல வருடங்களுக்கு முன்பே சத்தமில்லாமல் செய்து விட்டு அமைதியாக இருக்கிறார்.

உதாரணமாக 1970 ஆம் ஆண்டில் Thrilling Thematic Tunes என்ற ஆல்பத்தை அவர் ஸ்டீரியோ இசையில் அமைத்திருக்கிறார். ஆனால் தமிழின் முதல் ஸ்டீரியோ பதிவு இதற்கு எட்டு வருடம் கழித்துத்தான் நடந்ததாகச் சிலர் சொல்லிக் கொண்டிருக்கிறாகள்.

Fusion என்று சொல்லப்படும் கலவை இசையை இவர் 1958இல் வெளியான பதி பக்தியிலேயே ராக் ராக் ராக் என்ற பாடலில் அமைத்திருக்கிறார் 'அடாணா' ராகமும்,'ராக் அண்ட் ரோல்' இசையும் இணைந்து ஒலிக்கும் பாடல் இது).

ஜாஸ் (வர வேண்டும் ஒரு பொழுது - கலைக்கோவில் மற்றும் பல பாடல்கள்), வால்ட்ஸ் (கண்ணிரண்டும் மின்ன மின்ன - ஆண்டவன் கட்டளை) போன்ற மேற்கத்திய இசையின் பல வடிவங்களை மிக இயல்பாகக் கையாண்டிருக்கிறார்.

1960 ஆம் ஆண்டுக்கு முன்பே சிம்பஃனி என்ற இசை வடிவையும் இவர் கையாண்டிருப்பதாக இசையின் பரிமாணங்களை அறிந்த என் நண்பர்கள் சொல்லக் கேட்டிருக்கிறேன். 'ஒருவர் வாழும் ஆலயம்'  என்ற 'நெஞ்சில் ஓர் ஆலயம்' படப்  பாடலில் கூட  சிம்ஃபனி அமைப்பு இருப்பதாக அறிகிறேன்.

'கர்ணன்' படத்தில் இவர் ஹிந்துஸ்தானி ராகங்களையும் இசைக்கருவிகளையும் கையாண்ட அளவுக்கு ஹிந்திப் பட இசை அமைப்பாளர்கள் கூடக் கையாண்டதில்லை!

மெல்லிசை என்பதற்கு ஒரு புதிய வடிவம் கொடுத்தவர் இவர். எம்.எஸ்.வி. போட்ட பாதையில்தான் தாங்கள் செல்கிறோம் என்று இளையராஜா, ஏ.ஆர்.ரஹ்மான், ஹாரிஸ் ஜெயராஜ், வித்யா சாகர், தேவா, பரத்வாஜ் போன்ற பல இசை அமைப்பாளர்களும் வெளிப்படையாக ஒப்புக்கொண்டிருக்கின்றனர்.

இசை நுணுக்கம் அறிந்த கமலஹாசன் 'தமிழ்த் திரை இசையில் எம்.எஸ்.வியின் பாதிப்பு இல்லாமல் யாராலும் இசை அமைக்க முடியாது' என்று சொல்லி இருக்கிறார்.

கர்நாடக சங்கீதத்தைப் பொறுத்தவரை, மற்ற பல இசை அமைப்பாளர்களைப் போல் எம்.எஸ்.வி. குறிப்பிட்ட ராகங்களில் இசை அமைப்பதில்லை (ஒரு சில பாடல்களைத் தவிர) 'கவிதைக்குள் இசை இருக்கிறது. அதைக் கண்டுபிடிப்பதுதான் என் வேலை' என்பார் எம்.எஸ்.வி.

ஒரு பாடலை அவரிடம் கொடுத்தால் அதைப் படித்து அதன் பொருளைப் புரிந்து கொண்டு அந்தப் பாடலுக்கு மெட்டு அமைப்பார் எம்.எஸ்.வி. அவர் பாடல்களின் அழகைப் பார்த்து கல்யாணி, காம்போதி, மோஹனம், பைரவி போன்ற ராகங்கள் அவர் பாட்டுக்குள் போய் சில இடங்களில் அமர்ந்து கொள்ளும். அவர் பாடலை ஆய்வு செய்பவர்கள், இது கல்யாணி போலவும் இருக்கிறது, மோஹனம் போலவும் இருக்கிறதே என்று குழம்புவது இதனால்தான்.

'மல்லிகை என் மன்னன் மயங்கும்' பாடலைக் கேட்ட லால்குடி ஜெயராமன் அவர்களுக்கு இது போன்ற ஒரு குழப்பம் ஏற்பட்டு அவர் கர்நாடக இசை விமர்சகர் சுப்புடுவிடம் கேட்க, சுப்புடு, "விஸ்வநாதனின் பாடல்கள் அவரே உருவாக்கிய ராகங்களில் அமைந்தவை. எனவே அவற்றுக்கெல்லாம் 'விஸ்வ கல்யாணி,' 'விஸ்வ மோஹனம்,' 'விஸ்வ பைரவி' என்றெல்லாம்தான் பெயர் வைக்க வேண்டும்" என்றாராம். யாரையுமே எளிதில் பாராட்டாத சுப்புடு அவர்களிடமிருந்து வந்த இந்த வார்த்தைகளை விடப் பெரிய பாராட்டு வேறென்ன இருக்க முடியும்?

எம்.எஸ்.வியுடன் சேர்ந்து 'சங்கமம்' என்ற இசை நிகழ்ச்சியை நடத்தினார் மகாராஜபுரம் சந்தானம் அவர்கள். நாரத கான சபாவில் நடந்த இந்நிகழ்ச்சியில் நேரில் கலந்து கொண்ட நான் , "நான் எம்.எஸ்.வியின் ரசிகன்" என்று சந்தானம் அவர்கள் கூறியதைக் கேட்டுப் புல்லரித்துப் போனேன்.

"எம்.எஸ்.வியின் இசையை நான் கூர்ந்து கேட்பேன். அவர் பாடல்களில் இருக்கும் சில அற்புதமான சங்கதிகளை என் பஜனைப் பாடல்களுக்குப் பயன்படுத்திக் கொள்வேன்" என்று பிரபல கர்நாடக இசைக் கலைஞர் அருணா சாய்ராம் அவர்கள் ஹிந்து பத்திரிகைக்கு அளித்த பேட்டியில் கூறி இருக்கிறார்.

எம்.எஸ்.வியுடன் இணைந்து பணியாற்றிய கர்நாடக இசைக் கலைஞர் ஜி.எஸ்.மணி அவர்கள், "எம்.எஸ்.வியுடன் இணைந்து பணியாற்றியதால் என் கர்நாடக இசைத்திறன் மெருகேறி இருக்கிறது" என்று msvtimes.com நிகழ்ச்சியில் பேசும்போது குறிப்பிட்டார்.

கண்ணதாசன் - விஸ்வநாதன் இணையின் இசைப்பங்களிப்பு திரை இசையைத் தாண்டியும் அமைந்திருக்கிறது. இவர்கள் படைப்பில் வந்த கிருஷ்ண கானம் என்ற ஆல்பத்துக்கு இணையாக வேறு பக்திப் பாடல்களைக் குறிப்பிட முடியுமா? 'புல்லாங்குழல் கொடுத்த மூங்கில்களே,' 'ஆயர்ப்பாடி மாளிகையில்' என்ற இரண்டு பாடல்களும் பக்திப் பாடல் வரிசையில் முதல் இரண்டு இடங்களைப் பிடிக்கும் என்பது எனது கருத்து. இது தவிர, தேவாரம், திருவாசகம், அய்யப்பன் பாடல்கள், அம்மன் பாடல்கள் என்று பல பக்திப்  பாடல் ஆல்பங்களை உருவாகி இருக்கிறார் எம்.எஸ்.வி.

1962 ஆம் ஆண்டில் நடந்த சீனப்போரின்போது 'சிங்கநாதம் ஓடுது' என்ற ஒரு குறும் படம் எடுக்கப்பட்டது. சிவாஜி, ஜெமினி, சாவித்திரி போன்ற பல முன்னணி நட்சத்திரங்கள் நடித்த இத்திரைப்படத்தை இயக்கியவர் திரு பீம்சிங் என்று நினைக்கிறேன். சென்னை போன்ற ஒரு சில நகரங்களில் மட்டுமே (திரைப்படத்துக்கு முன்பு வரும் செய்திப்படம் போல்) திரையிடப்பட்ட இந்தப் படத்தை ஒரு கிராமத்தில் வசித்த என்னால் வானொலியில் ஒலிச்சித்திரமாகத்தான் கேட்க முடிந்தது. கண்ணதாசன் எழுதி விஸ்வநாதன் - ராமமூர்த்தி இசை அமைத்த 'சிங்க நாதம் கேட்குது, சீன நாதம் ஓடுது,' என்ற பாடல் ஐம்பது ஆண்டுகளுக்குப் பிறகும் என் காதில் ஒலித்துக் கொண்டிருக்கிறது. இந்தப் பாடல் எல்லாம் இப்போது கிடைக்குமா என்றே தெரியவில்லை.

சென்னையில் பிர்லா கோளரங்கம் துவக்கப்பட்டபோது அதன் நிகழ்ச்சிகளுக்குப் பின்னணி இசை அமைத்தவர் எம்.எஸ்.விதான் என்று ஒரு பத்திரிகையில் படித்தேன். அந்த இசை இப்போது மாற்றப்பட்டிருக்கலாம்.

இந்திப்பட இசை அமைப்பாளர்கள் பலருக்கு எம்.எஸ்.வியின் மீது பெரு மதிப்பு உண்டு. எம்.எஸ்.வியால் தனது குரு என்று கருதப்படும் நௌஷத் அலி அவர்கள் பங்கேற்ற ஒரு விழாவில் ஒருவர் எம்.எஸ்.வியை 'தென்னாட்டு நௌஷத் அலி (Naushad Ali of the South)' என்று குறிப்பிட்டபோது, நௌஷத் அலி  "நான் 'வட நாட்டு எம்.எஸ்.வி (MSV of the North)' என்று அழைக்கப்படுவதையே விரும்புவேன்" என்றார்.


'சிவந்த மண்' படத்துக்காக 'ஒரு ராஜா ராணியிடம்' பாடலுக்கு எம்.எஸ்.வி இசை அமைப்பதை நேரில் பார்த்த இசை அமைப்பாளர் ஜெய்கிஷன், அந்த நீண்ட பாடலுக்கு எம்.எஸ்.வி. சுமார் நான்கு மணி நேரத்தில் இசை அமைத்து விட்டதைப் பார்த்துப் பிரமித்து, "இது போன்ற ஒரு பாடலுக்கு இசை அமைக்க எங்களுக்குப் பத்து நாட்கள் பிடிக்கும்!" என்று சொல்லி வியந்து எம்.எஸ்.விக்கு ஒரு ஆர்மோனியபெட்டியைப் பரிசளித்து விட்டுச் சென்றார்.

எம்.எஸ்.வியின் சாதனைகளையும் பெருமைகளையும் சொல்லிக்கொண்டே போகலாம். இதை ஒரு பாரதம் போல் விரிவாகச் சொல்ல ஒரு வியாசரும், அதை எழுத ஒரு விநாயகரும் வேண்டும்!

எம்.எஸ்.வி. அவர்கள் பாவத்துக்கு எவ்வளவு முக்கியத்துவம் கொடுப்பவர் என்பதற்கு ஒரே ஒரு சான்று. பாலசந்தரின் திரைப்படங்களின் துவக்கத்தில் 'அகர முதல' என்ற திருக்குறள் வரும். ஆரம்ப காலங்களில் இதைப் பாடியவர் எம்.எஸ்.வி. பிற்காலத்தில் வேறொரு இசை அமைப்பாளரின் குரலில் இதைப் பாட வைத்து மாற்றி விட்டார் பாலசந்தர்.

இங்கே அவரது இரண்டு திரைப்படங்களுக்கான இணைப்பைக் கொடுத்திருக்கிறேன். திரைப்படங்களின் துவக்கத்தில் வரும்  'அகர முதல..' என்ற திருக்குறளை மட்டும் கேளுங்கள். 'அவள் ஒரு தொடர்கதை'யில் இதைப் பாடி இருப்பவர் எம்.எஸ்.வி. 'மனதில் உறுதி வேண்டும்' படத்தில் இதைப் பாடி இருப்பவர் இன்னொருவர். எம்.எஸ்.வி. பாவத்துக்கு எவ்வளவு முக்கியத்துவம் கொடுப்பவர் என்பதை இதிலிருந்து உணர்ந்து கொள்ளலாம்.



தமிழ் மொழி பற்றிய மூன்று பாடல்களுக்கு இசை அமைக்கும் பெருமை எம்.எஸ்.விக்குக் கிடைத்திருக்கிறது.

மனோன்மணி சுந்தரம் பிள்ளை எழுதிய 'நீராடும் கடலுடுத்து' என்று துவங்கும் தமிழ்த்தாய் வாழ்த்து. 1968ஆம் ஆண்டு சென்னையில் நடைபெற்ற உலகத் தமிழ் மாநாட்டுக்காக இசை அமைக்கப்பட்ட இப்பாடல் அன்று முதல் இன்று வரை தமிழக அரசின் நிகழ்ச்சிகளின் துவக்கத்தில் தமிழ்த்தாய் வாழ்த்தாகப் பாடப் படுகிறது.

பாரதிதாசன் எழுதிய 'தமிழுக்கும் அமுதென்று பேர்' என்ற பாடலுக்கு 'பஞ்சவர்ணக்கிளி' படத்துக்காக இசை அமைத்தார் எம்.எஸ். வி. மயக்கும் இனிமை கொண்ட மெட்டும், அடுக்கடுக்காய் வந்து விழும் வாத்தியக் கருவிகளின் இசை அழகும் சேர்ந்து இந்தப் பாடலைத் தமிழ்த்தாய்க்கு ஒரு அழகான அணிகலனாகத் திகழச் செய்கிறது.

மூன்றாவதாக 'கலங்கரை விளக்கம்' படத்துக்காக பாரதிதாசனின் 'சங்கே முழங்கு' என்ற பாடலுக்கு இசை அமைத்திருக்கிறார் எம்.எஸ்.வி. இது தமிழர் பண்பாட்டையும், பெருமைகளையும் பெருமிதத்துடன் பறை சாற்றும் ஒரு அற்புதமான பாடல்.

கொஞ்சம் ஆழமாகப் பார்த்தால், தமிழ்த்தாய்க்கு வணக்கத்தைத் தெரிவிக்கும் 'நீராடும் கடலுடுத்த' இயற்றமிழைக் குறிப்பதாகவும், தமிழின் இனிமையைக் கொஞ்சும் இசையில் கூறும் 'தமிழுக்கும் அமுதென்று பேர்' இசைத்தமிழைக் குறிப்பதாகவும்', தமிழர் பண்பாட்டையும், தமிழர் ஒற்றுமையையும் உரத்த குரலில் பறை சாற்றும்  'சங்கே முழங்கு' நாடகத் தமிழைக் குறிப்பதாகவும் கொள்ளலாம்.

எனவே, இயல், இசை, நாடகம் என்ற முத்தமிழின் பெருமையை நிலை நாட்டும் வகையில் இந்த மூன்று பாடல்களை அமைத்திருக்கிறார் எம்.எஸ்.வி என்று கொள்ளலாம். அரசு இவருக்குக் கொடுக்கத் தவறிய அங்கீகாரத்தை  விடப் பல மடங்கு சிறப்பான அங்கிகாரத்தைத் தமிழ் தெய்வம் இந்த இசை மேதைக்கு வழங்கி இருக்கிறது. இதை விட வேறென்ன பெருமை வேண்டும்?

தமிழ்த்தாயின் தவப் புதல்வரான கண்ணதாசானின் மீது  இசைத்தாய் அன்பு கொண்டு அவரது பாடல்களை எம்.எஸ்.வி, கே.வி.மகாதேவன், ஜி.ராமநாதன் போன்றோரின் இசை அமைப்பில்  சிரஞ்சீவித்துவம் கொண்ட பாடல்களாக இவ்வுலகில் நிலை பெறச் செய்திருக்கிறாள்.

இசைத்தாயின் தவப்புதல்வரான எம்.எஸ்.வியின் மீது தமிழ்த்தாய் அன்பு கொண்டு அவர் மூலம் இயல், இசை, நாடகம் என்ற தனது மூன்று வடிவங்களுக்கும் காலத்தால் அழியாத இசை வடிவம் அமைக்கச் செய்திருக்கிறாள்.

தமிழாலும் இசையாலும் ஒன்று பட்டு, இசையையும் தமிழையும் வளர்த்த இந்த இரு கலை மேதைகளின் பிறந்த நாட்கள் ஒரே மாதத்தில், ஐந்து நாட்கள் இடைவெளியில் அமைந்திருப்பது தற்செயலாக அமைந்த செயல் அல்ல!


Monday, April 13, 2015

11. "தமிழ்ப்" புத்தாண்டு வாழ்த்துக்கள்


அனைவருக்கும் என்னுடைய புத்தாண்டு வாழ்த்துக்கள்.

இன்று புத்தாண்டுதான். ஆனால் இது தமிழ்ப் புத்தாண்டுதானா என்பது குறித்து எனக்கு ஐயப்பாடு உண்டு.

சரி. இன்று பிறந்திருக்கும் புதிய ஆண்டின் பெயர் என்ன? உங்களில் எத்தனை பேர்  பஞ்சாங்கத்தைத் தேடி ஓடுகிறீர்கள், எத்தனை பேர் புத்திசாலித்தனமாக இன்னொரு வலைப் பக்கத்தைத் திறந்து முக்காலும் உணர்ந்த முழு அறிஞர் கூகுள்  தாத்தாவின் உதவியை நாடுகிறீர்கள் என்று எண்ணிப் பார்க்கிறேன்.

கண்டு பிடித்து விட்டீர்களா மன்மத ஆண்டின் பெயரை?

சரி அடுத்த கேள்வி. இந்த முறை பஞ்சாங்கம், கூகுள் போன்ற வழிகாட்டிகளை நாடாமல் பதில் சொல்லுங்கள்.

தமிழ் ஆண்டுகள் எத்தனை?

'அறுபது' என்று சொன்னவர்கள்  உஙளுக்கு நீங்களே ஐந்து மதிப்பெண்கள் போட்டுக் கொள்ளுங்கள்!

அடுத்த கேள்வி. இதற்கும் சரியாக பதில் சொன்னால் இன்னொரு ஐந்து மதிப்பெண்கள் உண்டு.

முதல் தமிழ் ஆண்டின் பெயர் என்ன?

இதற்கு பதில் தெரிந்தவர்கள் மிகக் குறைவாகவே இருப்பார்கள், அவர்களில் நீங்கள் ஒருவராக இருந்தால், 'பழைய பஞ்சாங்கம்' என்று உங்களுக்குப் பட்டம் சூட்டி மகிழ்கிறேன்.

இந்தப் பெயர்களை நீங்கள் பஞ்சாங்கத்தில்தான் பார்க்க முடியும்! இதோ அறுபது வருடங்களின் பெயர்கள். அடுத்த ஆண்டு நான் இதே கேள்வியைக் கேட்டால் நீங்கள் சரியாக பதில் சொல்லிப் பரிசு வாங்கலாம்!

1. பிரபவ 2. விபவ 3. சுக்ல  4. பிரமோதூத  5. பிரஜோத்பத்தி  6. ஆங்கிரஸ  7.ஸ்ரீமுக  8. பவ  9.யுவ  10.  தாது  11.ஈஸ்வர  12.வெகுதான்ய  13.பிரமாதி 14.விக்ரம 15.விஷு  16.சித்ரபானு  17.சுபானு   18.தாரண  19.பார்த்திப  20.விய  21.சர்வஜித்  22. சர்வதாரி  23.விரோதி 24.விக்ருதி  25.கர  26.நந்தன  27.விஜய  28.ஜய  29.மன்மத  30.துர்முகி  31.  ஹேவிளம்பி  32.விளம்பி  33.விகாரி  34.சர்வாரி  35.பிலவ  36.சுபகிருது  37.  சோபகிருது  38.குரோதி 39.  விஸ்வாவசு  40.பராபவ  41.பிலவங்க  42.கீலக  43.சௌமிய  44.சாதாரண  45.விரோதிகிருது  36.பரிதாபி  47.பிரமாதீச  48.ஆனந்த  49.ராட்சஸ  50.நள 51.ப்ங்கள  52.காளயுக்தி  53.சித்தார்த்தி  54.ரௌத்ரி  55.துன்மதி  56.துந்துபி   57.ருத்ரோத்காரி                        58. ரக்தாக்ஷி  59.குரோதன  60.அக்ஷய

எதற்கு இந்தப் பெயர்கள் எல்லாம் என்று கேட்கிறீர்களா?

அடுத்த கேள்வி கேட்கத்தான். ஆனால் இந்தக் கேள்விக்கு நீங்கள் புத்தகத்தைப் பார்த்தே பதில் சொல்லலாம்!

மேலே உள்ள பெயர்களில் எத்தனை பெயர்கள் தமிழ்ப் பெயர்கள்?

கூட்டிக் கழித்துப் பார்த்து விட்டு '0' என்று பதில் சொன்னால் உங்களுக்கு முழு மதிப்பெண்கள்!

இந்தக் கேள்வி என் பள்ளி நாட்களிலேயே  "தமிழ்" வருடங்களின் பெயர்களைப் படித்தபோதே என் மனதில் எழுந்தது.

கேள்வி பிறந்தது அன்று
பதில் கிடைக்கவில்லை இன்றுவரை!

முழுக்க முழுக்க சம்ஸ்கிருதப் பெயர்களைக் கொண்ட இவற்றை எப்படித் தமிழ் வருடங்கள் என்று சொல்கிறோம்? எங்கேயோ உதைக்கிறது.

'தமிழ்ப் புத்தாண்டு' என்ற பெயரே வினோதமாக இருக்கிறது. ஒரு மொழியின் பெயரில் ஒரு கால அட்டவணையா (calendar? மறுபடியும் உதைக்கிறது.

சிலர் சம்ஸ்கிருதப் பெயர்கள் பலவற்றை நாம் பயன்படுத்தவில்லையா என்று கேட்பார்கள். பயன்படுத்துகிறோம். ஆனால் அவற்றைத் தமிழ்ப் படுத்தித்தான் பயன்படுத்துகிறோம். சம்ஸ்கிருதத்தில் கிருஷ்ணஹ என்று இருப்பதைத் தமிழில் கிருஷ்ணன் என்று சொல்கிறோம். அதுபோல் பிரபவ என்ற பெயர் பிரபவம் என்றாவது மாற்றப்பட்டிருக்க வேண்டும். இதற்கும் ஒரு பதில் இருக்கும். பெயருக்குப் பின் வருடம் என்று வருவதால் பிரபவம் வருடம் என்று சொன்னால் சரியாக இருக்காது. பிரபவ வருடம் என்றால்தான் இயல்பாக இருக்கும். இந்த வாதத்தின்படி பார்த்தால் கும்பகோணம் நகரம் என்று சொல்லக்கூடாது, கும்பகோண நகரம் என்றுதான் சொல்ல வேண்டும்!

முழுக்க முழுக்க சம்ஸ்கிருதப் பெயர்களைக் கொண்ட ஒரு கால அட்டவணையைத் தமிழ்க் கால அட்டவணை (Tamil calendar) என்று சொல்வதை என்னால் ஏற்க முடியாது.

சித்திரை முதல் நாளில் நாம் கொண்டாடும் இந்தப் புத்தாண்டை 'இந்துப் புத்தாண்டு' என்று அழைக்கலாம், தமிழ்ப் புத்தாண்டு என்று அழைப்பதில் பொருத்தம் இல்லை. ஆனால் நாம் இதை 'இந்துப் புத்தாண்டு என்று சொன்னால் மற்ற மாநிலங்களில் உள்ள இந்துக்கள் ஏற்க மாட்டார்கள்.

ஆனால் தமிழர்கள் மீது எதை வேண்டுமானாலும் திணிக்கலாம். ஆயிரக்கணக்கான வருடங்களாக நாம் விநாயக சதுர்த்தியைக் கொண்டாடும் விதத்தை மாற்றி மஹாராஷ்டிராவில் கொண்டாடுவது போல் ஊர்வலமாகப் போய்க் கடலில் சிலைகளைக் கடலில் கரைப்பது என்ற முறையை நம் மீது திணிக்கவில்லையா! நாமும் அதைச் சற்றும் தயங்காமல் ஏற்றுக்கொள்லவில்லையா?அதுபோல்தான் இந்தத் தமிழ்ப் புத்தாண்டு விவகாரமும்!

என்னைப் பொறுத்தவரை சித்திரைத் திங்கள் முதல் நாளில் நாம் கொண்டாடுவது இந்துப் புத்தாண்டு, தமிழ்ப் புத்தாண்டு இல்லை!